असोज ३१, काठमाडौं । बडादसैँअन्तर्गत आज नवरात्रको सातौँ दिन, फूलपाती। नेपाली हिन्दु धर्मावलम्बीहरूले घरघरमा फूलपाती भित्र्याएर श्रद्धा र भक्तिपूर्वक दुर्गा भवानीको पूजा–आराधना गर्दैछन्।
दसैँको महत्त्वपूर्ण दिनका रूपमा लिइने फूलपातीका अवसरमा घर तथा पूजाकोठामा फूलपाती भित्र्याउने, दुर्गा भवानीको पूजा गर्ने र परिवारका सदस्यबीच खुसी साटासाट गर्ने परम्परा छ। फूलपाती भित्र्याएसँगै दसैँको उल्लास थप बढ्ने गर्छ।
फूलपातीमा नौ प्रकारका वनस्पति तथा पवित्र सामग्री भित्र्याउने धार्मिक परम्परा छ। विभिन्न स्थानमा फूलपातीका सामग्री भित्र्याउने विधि र चलन फरक–फरक भए पनि यसको मुख्य उद्देश्य दुर्गा भवानीप्रति श्रद्धा व्यक्त गर्नु र सुख, शान्ति तथा समृद्धिको कामना गर्नु हो।
फूलपातीका दिन काठमाडौंको हनुमानढोका दरबारस्थित दसैँघरमा पनि परम्परागत रूपमा फूलपाती भित्र्याउने विशेष समारोह आयोजना गरिन्छ। गोरखाबाट ल्याइएको फूलपातीसहितका सामग्री हनुमानढोका पुर्‍याउने ऐतिहासिक परम्पराले यस दिनको धार्मिक तथा सांस्कृतिक महत्त्वलाई थप उजागर गर्छ,फूलपातीले नेपाली समाजमा पारिवारिक एकता, सांस्कृतिक निरन्तरता र धार्मिक आस्थालाई जोड्ने काम गर्छ।
आज फूलपातीको अवसरमा देशभरका हिन्दु धर्मावलम्बीहरूले दुर्गा भवानीको आराधना गर्दै परिवारमा सुख, शान्ति, समृद्धि र उत्तरोत्तर प्रगतिको कामना गरिरहेका छन्।