‘माया गरेर भोट गर्नेहरुलाई निराश बनाउँदिन’: नेपाल स्टार बिजेता एलिना

सोमबार १९ माघ, २०७७ विचारवाटिका 2460

गायन रियालिटी शो ‘नेपाल स्टार’को शनिबार भएको फाइनलमा विजेता एलिना गुरुङले आफूलाई माया गरेर भोट गर्नेहरुलाई निराश हुन नदिने बताएकी छिन् ।

नेपाल टेलिभिजनबाट प्रशारण भएको गायन रियालिटी शोमा एलिनाले सुरेश लामा, सन्देश बमजन लामा र लक्ष्मण लिम्बुलाई पछि पार्दै टाइटल हात पारिन् । साथै उनले ३५ लाख नगद, १ करोडको जीवन विमा र विभिन्न गिफ्ट ह्याम्पर समेत जितिन् ।

पोखरा महानगरपालिका –१३ विपीमार्गकी एलिनाले सानैदेखि गायनमा रुचि राख्दै आएकी थिइन् । उनले केही गीत रेकर्ड समेत गराइसकेकी छिन् । पोखराका विभिन्न रेष्टुरेन्टमा गीत गाउँदै आएकी २५ बर्षिया एलिनाले ‘नेपाल स्टार’को उपाधि जितेपछि आफूलाई भोट गर्ने सबैलाई धन्यवाद समे दिएकी छिन् ।

‘प्लस टु’सम्मको अध्ययन पुरा गरेकी एलिनाले पोखरामै रहेर संगीत प्रशिक्षण लिएकी थिइन् । आउँदा दिनमा संगीत प्रशिक्षणलाई निरन्तरता दिँदै राम्रा–राम्रा गीतहरु स्रोता तथा दर्शकसामु गाउँदैजाने उनले बताएकी छिन् ।

सांगीतिक क्षेत्रमा आफूले धेरै काम गर्न बाँकी नै रहेको बताउँदै आउने दिनहरुमा पनि यसरी नै माया गरिदिन सबैमा उनले आग्रह गरेकी छिन् ।